ಕನ್ನಡ ವಿಕಾಸ ಶೈಕ್ಷಣಿಕ ಸಾಮಾಜಿಕ ಸಾಂಸ್ಕೃತಿಕ ಸಂಸ್ಥೆ

ಇದು ೧೯೮೯ರಲ್ಲಿ ನೋಂದಾಯಿತವಾದ ಕನ್ನಡವಿಕಾಸ ವಿದ್ಯಾಸಂಸ್ಥೆಯ  ಶಿಶು. ಕನ್ನಡ ಮಾತೃಭಾಷೆಯಲ್ಲಿ ಉನ್ನತ ಗುಣಮಟ್ಟದ ಶಿಕ್ಷಣವನ್ನು ಯಾವುದೇ ಹೆಚ್ಚಿನ ವಂತಿಕೆಯನ್ನು ಪಡೆಯದೆ ಒದಗಿಸುವ ಉದ್ದೇಶ ಸಂಸ್ಥೆಯದು. ಇದಕ್ಕೆ ಕೈಜೋಡಿಸಿದವರೆಲ್ಲರೂ ಕನ್ನಡವನ್ನು ಪ್ರೀತಿಸುವ ಮನಸ್ಸುಗಳು.

ಶಿಕ್ಷಣವೇ ಶಕ್ತಿ: ಸ್ವಾತಂತ್ರ್ಯದ  ಅನಂತರ ಈ ಶಕ್ತಿಯನ್ನು ಸಮಾಜದ ಎಲ್ಲ ವರ್ಗಗಳಿಗೂ ನೀಡಲು ಶಿಕ್ಷಣ ಸೌಲಭ್ಯಗಳನ್ನು ದೇಶದಾದ್ಯಂತ ವಿಸ್ತರಿಸಲಾಯಿತು. ಅದೇ ಉದ್ದೇಶದಿಂದ ದೇಶಭಾಷೆಗಳಲ್ಲಿ ಶಿಕ್ಷಣವನ್ನು ನೀಡುವ ಪ್ರಕ್ರಿಯೆ ಪ್ರಾರಂಭವಾಯಿತು. ಆದರೆ ಎಂಬತ್ತರ ದಶಕದಲ್ಲಿ ಶಿಕ್ಷಣವು ವ್ಯಾಪಾರೀಕರಣದ ದಾರಿಯನ್ನು ಹಿಡಿಯತೊಡಗಿತು. ಸರಕಾರಗಳು ಶಿಕ್ಷಣವನ್ನು ಖಾಸಗಿವಲಯಕ್ಕೆ ತೆರೆದುದರಿಂದ ವಿದ್ಯೆ ಮಾರಾಟದ ಸರಕಾಗಿ ಮಾರ್ಪಾಡಾಗುತ್ತಾ ಹೋಯಿತು. ಪ್ರಾರಂಭದಲ್ಲಿ ಇದು ಉನ್ನತಶಿಕ್ಷಣಕ್ಕೆ ಸೀಮಿತವಾಗಿದ್ದರೂ ಕ್ರಮೇಣ ಶಾಲಾಶಿಕ್ಷಣಕ್ಕೂ ವಿಸ್ತರಿಸಿತು. ಇದಕ್ಕೆ ಇನ್ನೊಂದು ಕಾರಣ ಶಾಲಾ ಶಿಕ್ಷಣವನ್ನು ಆಕ್ರಮಿಸುತ್ತಾ ಹೋದ ಆಂಗ್ಲಮಾಧ್ಯಮ. ನಗರಪ್ರದೇಶಗಳಲ್ಲಿ ಹೆಚ್ಚುತ್ತಾ ಹೋದ ಆಂಗ್ಲಮಾಧ್ಯಮ ಶಾಲೆಗಳು ಸಾರ್ವಜನಿಕರನ್ನು ಶೋಷಿಸುವುದರ ಜೊತೆಗೆ ಮಕ್ಕಳ ಬೌದ್ಧಿಕ ವಿಕಾಸಕ್ಕೆ ಕೊಡಲಿಪೆಟ್ಟು ಹಾಕತೊಡಗಿದವು ಮತ್ತು ನಾಡನುಡಿಯಾದ ಕನ್ನಡಕ್ಕೆ ಮಾರಕವಾಗತೊಡಗಿದವು. ಇಂತಹ ಸಂದಿಗ್ಧ ಸಂದರ್ಭದಲ್ಲಿ ಪ್ರಾರಂಭವಾದದ್ದೇ ನೃಪತುಂಗ ಕನ್ನಡ ಶಾಲೆ. ರಾಮಕೃಷ್ಣನಗರದ ಬಾಡಿಗೆ ಮನೆಯಲ್ಲಿ ಒಂದನೇ ತರಗತಿಯಿಂದ ಪ್ರಾರಂಭಿಸಿ ಹಂತ ಹಂತವಾಗಿ ಒಂದೊಂದೇ ತರಗತಿಗಳನ್ನು ಪ್ರಾರಂಭಿಸುತ್ತಾ ೨೦೦೦ದ ಇಸವಿಯಲ್ಲಿ  ಮೊದಲ ಎಸ್.ಎಸ್.ಎಲ್.ಸಿ. ತಂಡ ಹೊರಬಂದಿತು. ೨೦೦೩ರಲ್ಲಿ ರಾಮಕೃಷ್ಣನಗರದಲ್ಲೇ ಈಗಿನ ಸ್ವಂತ ಕಟ್ಟಡದಲ್ಲಿ ತರಗತಿಗಳು ಪ್ರಾರಂಭವಾದವು. ೨೦೧೯ರಲ್ಲಿ ಕನ್ನಡ ಪದವಿ ಪೂರ್ವ ವಿಜ್ಞಾನ ಮತ್ತು ವಾಣಿಜ್ಯ ಕಾಲೇಜು ಪ್ರಾರಂಭವಾಯಿತು .

        ಸಂಸ್ಥೆಯ ಕಾರ್ಯವ್ಯಾಪ್ತಿಯನ್ನು ವಿಸ್ತರಿಸುವ ಉದ್ದೇಶದಿಂದ ನಮ್ಮ ಟ್ರಸ್ಟಿನ ಹೆಸರನ್ನು ೨೦೦೦ ದಲ್ಲಿ “ಕನ್ನಡವಿಕಾಸ ಶೈಕ್ಷಣಿಕ ಸಾಮಾಜಿಕ ಸಾಂಸ್ಕೃತಿಕ ಸಂಸ್ಥೆ“ ಎಂದು ಬದಲಾಯಿಸಲಾಯಿತು. ೨೦೧೬ ರಲ್ಲಿ ಸಂಸ್ಥೆಯ ಬೆಳ್ಳಿ ಮಹೋತ್ಸವವನ್ನು ಆಚರಿಸಲಾಯಿತು. ಅದರ ಅಂಗವಾಗಿ ನೆಲ, ಜಲ, ಭಾಷೆಗೆ, ಸಂಬಂಧಿಸಿದಂತೆ ರಾಜ್ಯಮಟ್ಟದ ವಿಚಾರ ಸಂಕಿರಣವನ್ನು ಏರ್ಪಡಿಸಲಾಗಿತ್ತು. ಜೊತೆಗೆ ನೆಲ ಜಲ ಭಾಷೆಗೆ ಸಂಬಂಧಿಸಿದಂತೆ ಗಣ್ಯರ ಲೇಖನಗಳನ್ನೊಳಗೊಂಡ ‘ನೃಪತುಂಗ-೨೫’ ಎಂಬ ಸ್ಮರಣಸಂಚಿಕೆಯನ್ನು ಲೋಕಾರ್ಪಣೆಗೊಳಿಸಲಾಯಿತು. ೨೦೧೬ರಲ್ಲಿ ಬೆಳ್ಳಿ ಹಬ್ಬವನ್ನು ಆಗಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಉದ್ಘಾಟಿಸಿದರು. 

ಈ ಸಂಸ್ಥೆಯ ಫಲಾನುಭವಿಗಳು ಬಹುತೇಕ ಸಮಾಜದ ಅವಕಾಶವಂಚಿತ ಜನರೇ ಆಗಿದ್ದಾರೆ. ಹಾಗಾಗಿ ನಮ್ಮಲ್ಲಿ ಓದುತ್ತಿರುವ ಬಹುತೇಕ ಎಲ್ಲಾ ವಿದ್ಯಾರ್ಥಿಗಳಿಗೂ ನಾವು ಈವರೆಗೂ ಯಾವುದೇ ವಂತಿಕೆಯನ್ನು ಪಡೆದಿಲ್ಲ. ಸಮಾಜದ ಕನ್ನಡದ ಮನಸ್ಸುಗಳ ಸಹೃದಯರೊಂದಿಗೆ ಮನವಿ ಮಾಡಿ ‘ಓದಿಗೆ ಆಸರೆ’ ಎಂಬ ದತ್ತು ಯೋಜನೆಯ ೪೦೦೦/- +೪೦೦೦/- ರೂಗಳನ್ನು, ಸಾರಿಗೆ ಯೋಜನೆಗೆ ೧೦೦೦/- ರೂಗಳನ್ನು ಪಡೆದುಕೊಂಡು ಕಲೆ ಸಂಸ್ಕ್ರತಿಯನ್ನು ಸಮೃದ್ಧಗೊಳಿಸುವ ನೆಲೆಯಲ್ಲಿ ಕನ್ನಡ ವಿಕಾಸ ವಿದ್ಯಾ ಸಂಸ್ಥೆ ರಮಾಗೋವಿಂದ ರಂಗಮಂದಿರವನ್ನು ೨೦೨೦ ರಲ್ಲಿ ಲೋಕಾರ್ಪಣೆಗೊಳಿಸಲಾಯಿತು. ಅವಕಾಶವಂಚಿತ ಬಡಮಕ್ಕಳಿಗೆ ಆಸರೆಯಾಗಿ ಅವರನ್ನು ಸುಶಿಕ್ಷಿತರನ್ನಾಗಿಸುತ್ತಿದ್ದೇವೆ.